குருதியில் நனைந்த குமரி -6
மார்சல் நேசமணி தலைமையிலான ஊர்வலம் அமைதியாகத்தான் முடிந்தது.
அதே 11-08-1954 அன்று மார்த்தாண்டம்(தொடுவெட்டி) பகுதியில் புதுக்கடை எனுமிடத்தில் பி.தாணுலிங்கம்(நாடார்) தலைமையில் 5000 மக்களுடன் மற்றொரு ஊர்வலம் தொடங்கியது.
"பட்டம் ஆட்சி ஒழிக"
"போலீஸ் அராஜகம் ஒழிக"
"ஐக்கிய தமிழகம் அமைத்தே தீருவோம்"
என முழங்கியபடி குமரித் தமிழர்கள் சென்றனர்.
ஊர்வலம் நகர நகர கூட்டம் 10,000ஐத் தாண்டிவிட்டது.
இதே நேரத்தில் மார்த்தாண்டம் உயர்நிலைப் பள்ளி மாணவர்கள் வகுப்பிலிருந்து வெளியேறி (விடுமுறை மறுக்கப்பட்டிருந்தது) ஓரணியில் திரண்டு ஊர்வலத்தோடு கலக்க வந்துகொண்டிருந்தனர்.
மலையாள காவல்துறை வழிமறித்து திரும்பி போகச் சொன்னது.
அந்த பள்ளி மாணவர்கள் மறுத்தனர்.
காவல்துறை அவர்களை கம்பால் அடித்து அவர்களுக்கு தலைமை தாங்கிய மாணவர் என்.செல்வராஜை கைதுசெய்தது.
மாணவர்கள் அவர்களை எதிர்த்து முழக்கமிட,
இதுதான் சமயம் என்று தயாராக இருந்த காவலர்கள் 9 வண்டிகளில் வந்திறங்கினர்.
திட்டமிட்டபடி ஐந்து குழுவாகப் பிரிந்து ஐந்து இடங்களில் நின்று கொண்டு எந்த முன்னறிவிப்புமின்றி கூட்டத்தை நோக்கி சரமாரியாக சுடத் தொடங்கினர்.
மக்கள் சிதறியோடினர்.
பிறகு பிணமாக வீழ்ந்தவர்களை அவசர அவசரமாக வண்டியில் தூக்கிப்போட்டனர்.
குற்றுயிராய்க் கீழே கிடந்தவர்களையும் தூக்கிப்போட்டனர்.
பல காயம்பட்டவர்களைப் பிடித்து வண்டியில் ஏற்றினர்.
அந்த குருதிபடித்த நெடுஞ்சாலையில் வண்டிகள் சென்று மறைந்தன.
பிற்காலத்தில் அக்காயம்பட்டவர்கள் குழித்துறை காவல்நிலையத்திற்கு கொண்டுசெல்லப்பட்டதாகத் தெரிகிறது.
அதன்பிறகு வீடு அவர்கள் திரும்பவேயில்லை.
(தொடரும்)
______________________________
குருதியில் நனைந்த குமரி -5
https://m.facebook.com/photo.php?fbid=642988709138119&id=100002809860739&set=a.108935022543493.9865.100002809860739&source=56
Monday, 28 December 2015
குருதியில் நனைந்த குமரி -6
Sunday, 27 December 2015
வட்டார ஆதிக்கம்
தமிழர் ஆட்சியில்
சாதி ஆதிக்கமோ
மத ஆதிக்கமோ
பண ஆதிக்கமோ ஆளுமை செலுத்தும் வாய்ப்பு மிக மிகக் குறைவுதான்;
ஆனால் வட்டார ஆதிக்கம் ஏற்பட வாய்ப்புள்ளது.
அதாவது படை கட்டமைத்து அரசியலைக் கைப்பற்றி தமிழர் நாட்டை வழிநடத்தும் அத்தனைபேரும் ஒரு குறிப்பிட்ட வட்டாரத்தைச் சேர்ந்தவர்களாக இருப்பார்கள்.
அவர்கள் பேசும் வட்டார வழக்கு உயர்ந்த மதிப்பைப் பெறும்.
குருதியில் நனைந்த குமரி -5
குருதியில் நனைந்த குமரி -5
1954 ஆகஸ்ட் 9.
நேசமணி உள்ளிட்ட முக்கிய தி.த.நா.க தலைவர்கள் 2நாட்கள் முன்பாக திடீரென்று விடுதலை செய்யப்பட்டனர்.
ஆனாலும் செய்தி காட்டுத்தீ போல பரவி அவர்களை வரவேற்க வழிநெடுக மக்கள் குவிந்துவிட்டனர்.
மக்களின் பாராட்டுமழையில் நனைந்துகொண்டே வீடுபோய் சேர இரவானது.
அதே நாள் தி.த.நா.கட்சியின் தலைவர் இராமசாமி(பிள்ளை) கவலையோடு அமர்ந்திருந்தார்.
அவர் கையில் நேரு எழுதிய இரண்டு கடிதங்கள் இருந்தன.
தி.த.நா.க ஏற்பாடு செய்த அத்தனை நிகழ்ச்சிகளையும் போராட்டங்களையும் கைவிடுமாறு எழுதியிருந்தது.
"எல்லாம் இந்த டெல்லியை ஆட்டிப்படைக்கும் மலையாள கூட்டத்தின் வேலையாகத்தான் இருக்கும். இல்லையென்றால் நேருவே நேரடியாக அடுத்தடுத்த நாட்களில் இரண்டு கடிதங்கள் எழுதுவாரா?"
மறுநாள் காலை 151 என்ற எண்ணை தொலைபேசியில் சுழற்றினார்.
அதுதான் நேசமணியின் எண்.
"ஐயா உங்கள் விடுதலையின்போது செய்ய திட்டமிட்டிருந்த நிகழ்வுகளை எப்படி செய்வது?
மக்களுக்கு அறிவித்தாயிற்றே?!"
"நிகழ்வுகள் நடத்ததான் வேண்டும். நேரில் வாருங்கள் இது பற்றி விரிவாக பேசலாம்"
கிளம்பி நேசமணி வீட்டுக்குப் போனார்.
அங்கே அவர் யாருடனோ தொலைபேசியில் பேசிக்கொண்டிருந்தார்.
பேசிவிட்டு மகிழ்ச்சியுடன் வந்து அமர்ந்தார்.
"ஐயா! யாருடன் பேசிக்கொண்டிருந்தீர்கள்?
அவரை நேரில் வரவும் சொன்னீர்களே?!"
"அதுவா நமது 'உயிரன்பன்' அழைத்திருந்தார்.
நாளைய கூட்டத்திற்கு அவர் வரவுள்ளார்"
"யார்? கம்யூனிஸ்ட் ஜீவா அவர்களா?"
"ஆமாம். அவரேதான். அவர்தான் தமிழில் உயிரன்பன் என்று தன் பெயரை மாற்றிக்கொண்டுவிட்டார்"
"ஐயா வந்தவிடயத்தைக் கூறிவிடுகிறேன் நேரு நமது போராட்டங்களை கைவிடச்சொல்லி இரண்டு கடிதங்கள் எழுதியுள்ளார்"
நேசமணி அதிர்ச்சியடைவார் என்று எதிர்பார்த்தார்.
அவரோ இதைத்தான் எதிர்பார்த்தவர் போல புன்னகை செய்தார்.
கடிதங்களை வாங்கி படித்தார்.
"மாநில புனரமைப்பு குழு வரும்வரை அமைதியாக இருக்கச் சொல்லியிருக்கிறார்.
அதுவரை தன்னால் எந்த நடவடிக்கையும் எடுக்கமுடியாது என்று கூறியுள்ளார்"
"அதுதானே ஐயா புரியவில்லை.
நாம் அவரிடம் எந்த நடவிடிக்கையும் வேண்டவில்லையே?!"
"நாளை ஏதோ பெரிதாக நடக்கவுள்ளது.
அதன்பிறகும் எந்த நடவடிக்கையும் இருக்காது.
இதைத்தான் உணர்த்துகிறது அவர் கடிதம்.
மலையாளிகள் தங்களால் முடியவில்லை என்று நேருவை இழுக்கிறார்கள்.
அவர் பின்னால் ஒளிந்துகொண்டால் மட்டும் நாம் விட்டுவிடுவோமா?
திட்டமிட்டபடி நிகழ்வுகளை நடத்துங்கள்.
நடப்பது நடக்கட்டும்"
"ஐயா பொறுமையாக முடிவெடுங்கள். அவர் நினைத்தால் நம்மை அப்படியே கேரளாவோடு இணைத்துவிட முடியும்.
அவர் கையில் அதிகாரம் உள்ளது.
நேரு கோபத்திற்கு ஆளாகவேண்டுமா என்று யோசித்து முடிவெடுங்கள்"
"அதற்காக மக்கள் எழுச்சியை ஆறப்போடுவதா?!
நேரு என்ன நேரு?! காமராசரே சொன்னாலும் நான் மக்கள் எழுச்சியை பயன்படுத்தாமல் விடப்போவதில்லை.
நாம் இலக்கை நெருங்கிவிட்டோம்.
இனி துணிந்து செயல்படவேண்டியதுதான்"
_________________________
1954 ஆகஸ்ட் 11
திட்டமிட்ட படி ஜீவானந்தத்துடன் நாகர்கோவிலில் நேசமணி தலைமையிலான முதல் ஊர்வலம் பேரெழுச்சியுடன் தொடங்கியது.
பொதுவுடைமைக் கட்சி எம்.எல்.ஏ ஜீவானந்தம் முன்னே நடக்க கூட்டம் பின் தொடர்ந்தது.
நேருவுக்கு பதிலளிக்கும் வகையில் நேசமணியின் பேச்சு அமைந்தது.
"நாங்கள் தனிநாடு கேட்கவில்லை.
தமிழகத்தோடு இணைவதைத்தான் கோருகிறோம்.
இதனை மத்திய அரசு புரிந்துகொள்ளவேண்டும்.
நாம் கோழைகளாக இருக்கக்கூடாது.
விடுதலை வீரர்களாக இருக்கவேண்டும்.
இது நாட்டுக்கான போராட்டம்"
ஜீவானந்தம் கையை உயர்த்தி "ஐக்கிய தமிழகம்..." என்று கூற
மக்கள் "அமைத்தே தீருவோம்" என்று முழங்கினர்.
பெரும் கரவொலியுடன் நிறைவடைந்தது.
_____________________________
காவலர் ஒருவர் அருகிலிருந்த தலைமைக் காவலரிடம் மலையாளத்தில் கேட்டார்.
"சுட்டுப் பொசுக்கிவிடலாமா?"
"இங்கே வேண்டாம். மேலிடம் மறுத்துள்ளது.
தமிழகத் தலைவர் வேறு வந்திருக்கிறார்.
இன்னும் இரண்டு கூட்டங்கள் இருக்கின்றன.
அங்கே வைத்துக்கொள்வோம் கச்சேரியை"
(தொடரும்)
-------------
குருதியில் நனைந்த குமரி -4
https://m.facebook.com/story.php?story_fbid=642139169223073&id=100002809860739&refid=17&_ft_=top_level_post_id.642139169223073%3Atl_objid.642139169223073%3Athid.100002809860739%3A306061129499414%3A2%3A0%3A1451635199%3A-2074443726823932652#footer_action_list
Friday, 25 December 2015
வேற்றின ஆட்சியில் தமிழகத்தில் நடந்த வன்கொடுமைகள்
வேற்றின ஆட்சியில் தமிழகத்தில் நடந்த வன்கொடுமைகள்
1920 பெருங்காமநல்லூர் படுகொலை
ஒரு பெண் உட்பட 17பேர் சுட்டுக்கொலை
1939 மொழிப்போர் வீரர்கள் 2பேர் காவலில் வைத்திருந்து கொலை
1948 கேரள அரசால் 2 தமிழர்கள் சுட்டுக்கொலை
1953 இந்தி எதிர்ப்பு தொடர்வண்டி மறியலில் காவலரால் 2 பேர் கொலை
1954 தமிழகத்துடன் இணைய போராடிய குமரித் தமிழர்கள் 11 பேர் சுட்டுக்கொலை
1957 கீழத்தூவல் படுகொலை 5பேர் போலீசாரால் சுட்டுக்கொலை
1965 மொழிப்போரில் துணைராணுவத்துடன் மோதலில் 70பேர் கொலை
1968 கீழவெண்மணி 44பேர் எரித்துக்கொலை
1982 மொழியுரிமைக்காகப் போராடிய 18தமிழர் கன்னடரால் கொலை
1987 இடவொதுக்கீடு போராட்டம் துணைராணுவத்தால் 21பேர் கொலை
1989 கண்டமனூர் துப்பாக்கிச்சூடு 3குழந்தைகள் உட்பட ஐவர் சுட்டுக்கொலை
1991 காவிரி கலவரம் கன்னடரால் பலர் கொலை
1992 வாச்சாத்தி படுகொலை 34மரணம்
18பெண்கள் வல்லுறவு
1992 குறிஞ்சாக்குளம் படுகொலை 4பேர் வெட்டிக்கொலை
1994 வீரப்பனார் தேடுதல் படையினரால் அத்தனை சின்னாம்பதி ஊரில் பெண்களும் வல்லுறவு
1999 ல் மாஞ்சோலைத் தொழிலாளர் போராட்டத்தில் தடியடி நடத்தி 18பேரை ஆற்றில் தள்ளிக் கொன்ற தாமிரபரணி படுகொலை
2011 பரமகுடி 7பேர் சுட்டுக்கொலை
2015 ஆந்திர காவல்துறையால் செம்மரம் கடத்துவதாக போலி வழக்கில் 20 தமிழர்கள் படுகொலை
ஆக வேற்றினத்தாரின் அரச வன்முறைக்கு பலியானோர் அனைத்து சாதியிலும் உண்டு.
குருதியில் நனைந்த குமரி -3
குருதியில் நனைந்த குமரி -3
"தேவிகுளம், பீருமேடு பகுதியை கலவரபூமியாக்குங்கள்"
"வரப்போகும் 'மாநில புனரமைப்புக் குழுவை' குழப்பி அந்த பகுதியை எப்படியாவது தக்கவைத்துக்கொள்ளவேண்டும்"
"அதெப்படி மூணாறை நாம் விடமுடியும்?
பணிக்கரை அக்குழுவில் போட்டாயிற்று.
தமிழர் யாரும் அக்குழுவில் இடம்பெறாமல் செய்தாயிற்று.
எல்லாம் நேருவைச் சுற்றியிருக்கும் மேனன்கள் கிருபை"
1954ல் 'ஐக்கிய கேரளம்' கனவு கண்ட மலையாளிகளின் கூச்சல்கள் இவை.
இவைகள் நிறைவேறியும் விட்டன.
ஐக்கிய கேரளத்தில் நீலகிரி மாவட்டமும் கோவை மாவட்டமும் கூட சேர்க்கப்பட்டிருக்கும்,
நேசமணி என்றொரு தமிழன் பிறக்காமல் இருந்திருந்தால்.
குழப்பமான அந்த காலத்தில் 60 வயதில் நேசமணி தனது தளபதி அப்துல் ரசாக்குடன் மூணாறு தேயிலைத் தோட்டங்களில் கால்கடுக்க நடந்து ஆங்காங்கே காணப்படும் தமிழர்களின் குடிசைகள் ஒன்றுவிடாமல் சென்று சந்தித்து பேசி படிப்பறிவில்லாத அம்மக்களுக்கு எடுத்துக்கூறி தெம்பூட்டி போராட்டத்திற்கு ஆயத்தமாக்கினார்.
அவர் இருக்கும் தெம்பில் மூணாறு தமிழர்கள் துணிச்சலுடன் மலையாளிகளை எதிர்த்தனர்.
அதனால்தான் மலையாளிகளின் கொடுங்கரங்கள் நீலகிரி கோவை வரை நீளமுடியவில்லை.
தி.த.நா.க தலைவர்கள் கைது செய்யப்பட்டு தெருத்தெருவாக இழுத்துச் செல்லப்பட்டதை அறிந்ததும் தென் தமிழ் முனை கொந்தளித்தது.
"உங்களுக்கு 30 நாட்கள் கெடு, அதற்கு மேலும் தேவிகுளம் பீர்மேட்டில் குழப்பம் விளைவித்தால் மக்கள் அரசுக்கு எதிராக செயல்படுவார்கள்" நேரடியாக அறிவித்தார் நேசமணி.
அடங்க மறுத்தார் பட்டம் தாணுப்பிள்ளை.
ஜூன் 30ஆம் நாளை 'தேவிகுளம் தினமாக' முன்னெடுக்க தமிழகத்தைக் கோரினார்.
தமிழகம் அதைச் செய்தது.
போராட்டக்குழு அமைக்கப்பட்டது.
பி.இராமசாமி(பிள்ளை)
ஏ.குஞ்சன்(நாடார்)
ஆர்.பொன்னப்பன்(நாடார்)
ப.தாணுலிங்கம்(நாடார்)
எ.அப்துல் ரசாக்
கெடு முடிந்ததும். நேசமணி ரசாக்கையும் சிதம்பரநாதனையும் அழைத்துக்கொண்டு ஜூலை 2 (1954) அன்று புறப்பட்டு மூணாறு வந்து சேர்ந்தார்.
அதற்குள் பட்டம் அரசு அங்கே 144 தடை உத்தரவு ஒரு மாதகாலத்துக்குப் பிறப்பித்துவிட்டது.
ஜூலை 4 தடையை மீறி கூட்டம் கூடியது.
நேசமணி, ரசாக், சிதம்பரநாதன் மூவரும் கைதானார்கள்.
அடிப்படை வசதிகூட இல்லாத கோட்டையம் சிறையில் வைக்கப்பட்டனர்.
நேசமணியையே கைது செய்துவிட்டார்களா?!
தென்முனை குமுறியது.
தடை உத்தரவு இருந்த அந்த ஒரு மாத காலத்தில் தினம்தினம் தடையை மீறி பல தலைவர்கள் கைதானார்கள்.
அண்ணா ஆதரவளித்தார், ஜீவானந்தம் ஆதரவளித்தார்.
144 உத்தரவு முடியும்போது (9 எம்.எல்.ஏ உட்பட) மூணாறு தமிழருக்காகத் தடையை மீறி கைதானோர் எண்ணிக்கை எவ்வளவு தெரியுமா?
410 !!!!!
(தொடரும்)
____________________
குருதியில் நனைந்த குமரி -2
https://m.facebook.com/photo.php?fbid=641222135981443&id=100002809860739&set=a.108935022543493.9865.100002809860739&source=56
Wednesday, 23 December 2015
குருதியில் நனைந்த குமரி -4
குருதியில் நனைந்த குமரி -4
1954 ஆகஸ்ட் 9.
மாதவன் நாயர் (இந்திய தேசிய காங்கிரஸ் பொதுச் செயலாளர்) திருவனந்தபுரம் சிறைச்சாலையில் கண்கானிப்பாளர் அறையில் அமர்ந்திருந்தார்.
நேசமணியை அழைத்துவந்தனர்.
"ஐயா உமக்கு ஏன் இந்த வேலை?
தென்பகுதி மக்களைத்தான் அரசுக்கு எதிராகத் தூண்டிவிட்டீர்.
மூணாறு மக்களுக்கும் உங்களுக்கும் என்ன சம்பந்தம்?
அங்கேயும் போய் ஏன் கலகம் மூட்டுகிறீர்?
நீர் தலையெடுக்கும் வரை அங்கே மக்கள் தமிழகத்தோடு இணைவதைப் பற்றி சிந்திக்கவில்லை.
இப்போது ஒரே குழப்பமாகிவிட்டது இது உமக்கு திருப்தியா?"
"ஐயா நாயரே!
மூணாறு என்ன மூணாறு ,
5 ஆண்டுகள் முன்பு சென்னையை தெலுங்கர்களிடமிருந்து காக்க கூடிய முதல் மாநாட்டுக்கு அழைக்கப்பட்டு சென்றவன் நான்.
வில்லிசையோடு அம்மாநாட்டைத் தொடங்கிவைத்ததே ஒரு குமரித் தமிழன்தான்.
மூணாறு மக்கள் 95% தமிழர்கள், அவர்களுக்காக பேச வந்திருக்கும் நீர் ஒரு மலையாளி!
உமக்கு எப்படி புரியும் எங்கள் உணர்ச்சி?
அந்த மக்களை உழைக்கவைத்து உழைக்கவைத்து சுரண்டுவதைத் தவிர நீங்கள் ஒரு அடிப்படை வசதியேனும் செய்யவில்லை.
குமரித் தமிழனை விட மூணாறு தமிழனுக்குத்தான் தமிழகத்தில் இணையவேண்டிய கட்டாயம் இருக்கிறது.
பணம் காய்க்கும் மரத்தை நீங்கள் அத்தனை எளிதில் விடமாட்டீர்கள்தான்.
ஆனால் ஒரு அப்பாவியைத் தூக்கிலிருந்து காப்பாற்ற டெல்லி வரை போய் நீதி பெற்றுக் கொடுத்தவன் நான்.
25 லட்சம் தமிழர்கள் தாய்மண்ணோடு இணைவதற்காக என்னால் முடிந்தது அனைத்தையும் செய்வேன்.
மூணாறு தமிழனுக்கு மற்ற தமிழர்கள் யாரும் குரல்கொடுக்கவில்லை என்ற பெயர் வரக்கூடாது இல்லையா?"
"ஹ்ம். தமிழகத்திலிருந்துகூட உங்களுக்கு ஆதரவு கிடைக்காது.
நீர் அங்கே போய்ப் பாரும்.
யாரும் உங்களை மதிப்பதில்லை"
"எல்லாம் உங்கள் புண்ணியம்தான்.
தமிழைத் தடை செய்தீர்கள்.
மலையாளத்தை புகுத்தினீர்கள்.
சாதிய ஏற்றத்தாழ்வை உண்டாக்கி உயர்சாதித் தமிழர்களை உங்கள் பக்கம் சேர்த்துக்கொண்டீர்கள்.
நாங்கள் இன்று தமிழகத்திலிருந்து தோற்றத்தால் மொழி பேசும் முறையால் வேறுபட்டு நிற்கிறோம்.
ஆனால் நாங்கள் தமிழினம் என்பது மட்டும் மாறாது"
"தமிழ்நாட்டோடு சேர்ந்தால் முன்னேறிவிடுவீர்கள் என்று எதை வைத்து நம்புகிறீர்கள்?"
"முன்னேறுவதை விட சரியான அடையாளத்துடன் இருப்பது முக்கியம்.
வேறுமொழி பேசும் மேலிடத்திடம் எங்கள் குறைகளைக் கொண்டுசெல்லவே பல இடைஞ்சல்கள் ஏற்படும்.
மலையாள அரசு தமிழைப் புறக்கணிப்பதைக் கண்டு தன் சொந்த பணத்தில் பெரிய நன்கொடை அளித்தாரே வள்ளல் அழகப்பசெட்டியார் அதையும் கூட சரியாகப் பயன்படுத்தினீர்களா?
இல்லை.
தமிழைப் புறக்கணிக்கும் நீங்கள் எங்களுக்கு எந்தவிதத்திலும் நன்மையாய் அமையமாட்டீர்கள்.
நாங்கள் உயராவிட்டாலும் தாழாமல் இருக்க விரும்புகிறோம்"
"வேண்டாம் ஐயா, எம்மை சீண்டினால் கடும் விளைவுகள் ஏற்படும். உமக்கு தெரியாதா உம் முன்னோர் வரலாறு?"
"தெரியும். இது எங்கள் மண்.
இங்கே 400 ஆண்டுகள் பழமையான ஒரு மலையாள கல்வெட்டைக் காட்டமுடியுமா உங்களால்?!
பரசுராமர் படைத்த மண் என்ற புராணத்தைத் தவிர உங்களிடம் வேறு என்ன சான்று இருக்கிறது?!
இங்கே முதலில் தோன்றிய இயக்கம் தமிழர் இயக்கம் என்ற பெயரால் தோன்றவில்லை.
140 ஆண்டுகளுக்கு முன்பே 'மலையாள எதிர்ப்பு இயக்கம்'தான் முதலில் தோன்றியது.
25 ஆண்டுகள் முன்புதான் 'தமிழர் விடுதலை காங்கிரஸ்' தோன்றியது.
நாங்கள் தமிழர்கள் என்ற உணர்ச்சியை பெறுமுன் 'மலையாள எதிரிகள்' என்ற உணர்ச்சியைத்தான் முதலில் பெற்றோம்.
உங்கள் இயற்கை குணத்தை நாங்கள் நன்கு அறிவோம்"
"நாங்கள் என்ன மனிதர்கள் இல்லையா?
நாங்கள் கேட்பதாவது ஐக்கிய கேரளம்.
ஆனால் திருவாங்கூரைத் தனிநாடாக்க முயன்ற திவான் சி.பி.ராமசாமி ஐயர் தமிழர்தானே?!"
"ஆமாம். அதனால்தான் முகத்தில் சுடப்பட்டார். ஏதோ புண்ணியம் பிழைத்துவிட்டார். மறுநாளே சென்னைக்கு ஓடிவிட்டார்.
நானும் அதுபோல ஒரு துரோகியாக விரும்பவில்லை"
"முதல்மந்திரி உங்களை எச்சரிக்கச் சொன்னார். நான் சொல்லிவிட்டேன்.
இதன் பிறகு ஏற்படப்போகும் மோசமான விளைவுகளுக்கு நீர்தான் பொறுப்பு.
ஆறு ஆண்டு முன்பு ஆட்சியில் அவர் இருந்தபோது தமிழகத்துடன் நீங்கள் இணைய முயன்றபோது நடந்தது நினைவுள்ளதுதானே?!"
"எப்படி ஐயா மறக்கமுடியும்? செல்லையா தேவசகாயம் என்று
2 பேரை சுட்டுக் கொன்றார்.
200 பேர் கைகால்களை உடைத்தார்.
1000 பேரை சிறையில் அடைத்து கொடுமைபடுத்தினார்"
"எல்லாம் தெரிந்தும் ஏன் சமாதானமாக ஒற்றுமையாக இருக்க மறுக்கிறீர்"
"ஒற்றுமை என்பது இரு பகுதி மக்களும் சேர்ந்திருப்பது அதன்மூலம் இருவரும் நலமடைவது.
ஒரு பகுதி மக்களை இன்னொரு பகுதி மக்கள் சுரண்டிக்கொண்டே சேர்ந்திருப்பது என்பது ஒற்றுமை அல்ல.
சமாதானம் என்பது சகித்துக்கொள்வது என்றாகாது.
எந்த விளைவுகள் வந்தாலும் சரி நாங்கள் தமிழகத்துடன் இணைந்தே தீருவோம்"
"முடிவாக என்னதான் கூறுகிறீர்கள்?"
"மூணாறிலிருந்து மலையாள காவலரை போகச்சொல்லுங்கள்.
கோரிக்கை வைக்கப்பட்ட திட்டங்களைச் செயல்படுத்துங்கள்.
மாநில வரைவுக் குழு அவர்கள் பணியைச் செய்யவிடுங்கள்"
"இனி என் கையில் ஒன்றுமில்லை"
"பட்டத்தின் கொட்டமடக்குவேன் என்று கூறியே வாக்கு வாங்கி வென்றவன் நான்.
உங்கள் மிரட்டலுக்கு நான் பயப்படப்போவதில்லை"
மாதவன் நாயர் கோபத்துடன் வெளியேறினார்.
-------------
மூணாறு மக்களுக்காகத் தடையை மீறி
9 எம்.எல்.ஏ,
4 பஞ்சாயத்து யூனியன் தலைவர்கள்,
3 நகரசபை தலைவர்கள் உட்பட 410 பேர் கைதானார்கள்.
இதுபோக ஸ்டாம்ப் எரிப்பு, நீதிமன்ற மறியல், மாணவர் ஆர்ப்பாட்டம் என்று பெரிய போராட்ட நிகழ்வுகள் நடந்தன.
144 தடையை மீறி கைதான நேசமணி உள்ளிட்டோரின் விடுதலையைக் கொண்டாட 144 கார்களில் ஊர்வலமாகச் சென்று 50,000 பணமுடிப்பையும் வழங்க தமிழ் மக்களால் ஏற்பாடு செய்யப்பட்டது.
தமிழர்கள் என்றுமில்லாத எழுச்சியைக் கண்ட பட்டம் தாணுப்பிள்ளை இரண்டு நாட்கள் முன்பே அனைவரையும் விடுதலை செய்தார்.
இதனைத் தொடர்ந்து தி.த.நா.க ஏற்பாடு செய்த நிகழ்வுகளில் பெரும் வன்முறையை நிகழ்த்த துப்பாக்கிகள் தயார் நிலையில் வைக்கப்பட்டன.
அந்த நாளும் வந்தது.
(தொடரும்)
--------------------------------------------
குருதியில் நனைந்த குமரி -3
https://m.facebook.com/photo.php?fbid=641579359279054&id=100002809860739&set=a.108935022543493.9865.100002809860739&__tn__=E
ஆனைகொன்றான்
அனகோன்டா என்பது
"ஆனைகொன்றான்" என்பதில்
இருந்து வந்தது.
யானையே சுற்றிப்பிடித்து நெறித்துக் கொல்லும் வலிமையுடைய பாம்புகள்.
--~~~~~~~~<>