ஒரே அடியில்...
வீராவும் செல்வமும் ஒரு பெரிய குடோனில் வேலை செய்துவந்தனர்.
அதில் வீரா கொஞ்சம் சீனியர்.
குண்டாக நீளமான முடியுடன் இருப்பான்.
டியோ ஸ்கூட்டியில் வருவான்.
வாய்த்துடுக்கு அதிகம்!
எவரையும் நொடிப் பொழுதில் கவுன்ட்டர் போட்டு காலி செய்துவிடுவான்!
செல்வம் கொஞ்சம் சின்ன பையன்.
கருப்பாக ஒல்லியாக உயரமாக இருப்பான்.
பழைய ct 100 வண்டியில் வருவான்!
ஆனால் அந்த பழைய வண்டியை திறமையாக ஓட்டுவான்!
எப்போதும் மொட்டைத் தலையுடன் இருப்பான்!
கேட்டால் பெற்றோர் வேண்டுதல் என்பான்.
செல்வத்தைக் கண்டால் வீராவுக்கு கொண்டாட்டம் தான்!
வெளிப்படையாக ரேகிங் செய்வான்.
குடோனில் வேலைபார்த்த பெண்கள் முன்னிலையில் செல்வத்தை கலாய்த்து தள்ளுவான்!
செல்வம் முதலில் அமைதியாக இருந்து பார்த்தான்.
பிறகு சரிக்கு சரி பேசிப் பார்த்தான்.
வீராவின் நாக்கு வலிமைக்கு செல்வத்தால் ஈடுகொடுக்க முடியவில்லை!
அங்கே வேலைசெய்யும் இளம்பெண்களும் செல்வத்தை கடந்துபோகும் போது நமுட்டுச் சிரிப்பு சிரித்துக் கொள்வார்கள்.
ஒருநாள் வீரா வண்டியை சர்வீஸ் விட்டிருந்தான்.
செல்வம் தான் அவனை கூட்டிவந்தான்.
அன்று செல்வத்துக்கு பிறந்தநாள்.
வீரா அவனிடம் மதியம் பிரியாணியும் செவனப்பும் பீடாவும் வாங்கித்தர சொல்லி ஏறத்தாழ மிரட்டிக் கொண்டிருந்தான்!
சரியென்று இருவரும் வெளியே வந்தனர்!
வெளியே மரத்தடியில் காற்றோட்டமாக பெண்கள் அமர்ந்து சாப்பிட்டுக் கொண்டிருந்தனர்.
செல்வம் வண்டியில் ஏறி உதைத்து ஸ்டார்ட் செய்தான்.
வண்டியில் ஏறிய வீரா "டிரைவர் வண்டிய ஹோட்டலுக்கு விடு" என்றான்.
உடனே பெரிய உறுமலுடன் வண்டியின் முன்சக்கரம் மேல தூக்கியது!
அடுத்த நொடி புழுதிக்கு மத்தியில் செல்வம் வண்டியை திடமாக பிடித்தபடி தரையில் நின்றுகொண்டு இருந்தான்!
முன்விளக்கு வானத்தை நோக்கி இருக்கும்படி பைக் நட்டமாக நின்றுகொண்டு இருந்தது!
வீரா கீழே மல்லாக்க விழுந்து கிடந்தான்!
பெண்கள் விழுந்து விழுந்து சிரித்து கொண்டிருந்தனர்!
No comments:
Post a Comment